Das LWIII Projekt Texte:

Originaltexte von Loudon Wainwright III ( Titel in Klammern )

4 x 10_______Übersetzung: Ekkehard Tenschert

Es is koa Rätsel und nit neu
mia zwoa habn Vergangenheit
Mei neue Schutzwand hat koa Loch
vier Meter dick, zehn Meter hoch

Zwanzg Meter broat massive Wand
Zement und Wasser gmischt mit Sand
a Schutzwall, da kimmt koana dran
zum kloanen Buam, zum innern Mann

Da Bua küsst des Madl, de dann reat
weil si´s halt amoi so gheat
Und wenn du plearst bist wia a Abziehbild
von jeder Frau um de i mi bemüht hab

Und jeder durch di Nabelschnur
kriegts von der Mama scho als Bua
de war unglücklich, traurig, tot
wegn der Schutzwand de da Papa aufbaut hat

A Fundament zum weiterbaun
Mama Prinzessin, Papa Clown
Es is koa Rätsel und nit neu
Mia zwoa sind Vergangenheit 

Alle Heiligen Zeiten______________Übersetzung: Ekkehard Tenschert

Herr, jedes Jahr bei uns dahoam sitz ma um de Tafel
Gib mir die Stärke und die Kraft, daß i nit einfach abflieg
Segne Speis und Trank zu unserm Wohl, laß die Gespräche flach bleibn
damits nit glei aufs Neue losgeht, halt mi zrugg beim Rotwein

Laß diesen Kelch an mir vorübergehn, voll uralter Gefühle
so vü Gschichten aus alter Zeit sitzen mit uns da auf die Stühle
Erinner uns daß wir schon groß sind, vernünftig und erwachsen
Jetz müssen unsre Kinder brav sein, sonst gibts was auf die Pratzen

I schau mi um, i kenn sie guat, mein Bruder und mei Schwester
Wir habn uns scho so lang nit gsehn, und tan als wärs grad gwesn gestern
Bei dem besondern Anlaß, Herr, wenn i mi streit mit ihnen
dann hilf mir bitte, steh mir bei, und laß mi oanmal gwinnen

All des Essen schaut so guat aus, doch i kanns kaum genießen
Irgendeppas geht mir ab, i wills lieber gar nit wissen
nach m Essen schalt ma n Fernseher ein, a Fuaßballspiel is immer
Aber i bin miad, i muaß mi hinlegn, wo is des Gästezimmer?

I schlaf glei ein, i hab an Traum, als könnt i mi erinnern
Es is no nix Böses passiert, i muaß mi um gar nix kümmern
Mama und Papa boade no jung und klar das sie uns gern haben
liegn auf da Wiesn in der Nacht, schauen miteinand die Stern an  

Alls Unguate Zum Jahrestag (AUZJ)_____________Übersetzung: Tassilo Tenschert

auzj, seit aan joah bist davo
i häng und geh und steh herum,
in d'oabeit geh i no
i iß und trink und rauch und schlaf,
a bißl leb i scho
auzj, seit aan joah is davo

auzj, angfangd hats vor zehn joah
mia ham uns gsegn und warn verknallt,
mir warn a scheenes paar
und mit an knall wars a vorbei,
erinner mi nid dran
auzj, angfangd hats vor zehn joah

auzj, i denk an jedn tag
und a a jede nacht an di
a wenn i ma oft sag,
daß i di jetzt vergeßn sollt,
mei herz tuat so wia's mag
auzj, i denk an jedn tag...

auzj, seit aan joah bist davo
i häng und geh und steh herum,
in d'oabeit geh i no
i iß und trink und rauch und schlaf,
a bißl leb i scho
auzj, seit aan joah is davo 

Dei Mutter Und I______________Übersetzung: Ekkehard Tenschert

Dei Mutter und I, mia ziagn außernand
I woaß des klingt deppert, wie nit ganz bei Verstand
I ziag woanders hin, du bleibst bei ihr
aber jeds zwoate Wochenend kimmst dann zu mir

Dei Mutter und I lebn jetzt lieber getrennt
Irgendwann is irgendwas irgendwie falsch grennt
Alls auf der Welt ändert si mit der Zeit
Zerst hats uns zammzogn und dann wieder entzweit

Dei Mutter und I tan alls was ma können
Damit mas guat machn und uns guat um di kümmern
Manchmal bleibn Familien nit für immer zsamm
aber du bist nit schuld dran, mia hams halt nit dertan

Dei Mutter und I san jetz boade nit froh
aber s´werd wieder besser, es bleibt nit immer so
Und I hoff wenn du groß bist wirst es verstehn
Deine Eltern san Menschen und mehr samma nie gwen 

Entfernte Liebe______________Übersetzung: Tenschert bros.

Mit der Entfernung wachst die Liebe
und du spürst es wieder die zarten Triebe
aus vergangener Zeit
Wahrscheinlich hab i mi zu sicher gfühlt
hab oanfach so dahinglebt, hab mi zwenig bemüht um di
in meiner Herrlichkeit

Aber jetz bist gangen
Und i hab koa Ruah
Und i bi gar nimmer sicher
ob i´s no datua

I hab allweil gwußt, du bist wichtig für mi
aber jetz sig i daß überhaupt nit geht ohne di
I geh no dabei drauf
Allweil nur sonnig wars nit unser Lebn
es hat a öfter amoi a ordntlichs Wetter gebn aber jetz
reißts überhaupt nimmer auf

I kunnt nur mehr jammern
I woaß nit was toa
weil du bist nit da
und i bi so alloa

Lang hab I braucht, dann hab i´s gsegn
endlich hätt i´s kapiert: du warst es gwen
jetz wos z´spät is, das i da des no sag
Wenn ma uns wiedersegn
gibts a guats Glaserl Wein
zum Geburtstag werd i dir a Postkartn schreibn weil i woaß
wie sehr i di mag
wia i di mag 

GuatDrauf Blues______________Übersetzung: Ekkehard Tenschert

I bin aufgwacht in der Fria
hab mi gar nit so schlecht gfühlt
Letzte Nacht war gar nit übel
Es war alles halb so wüd
I hab guat gessen, di Bier hab i nit zählt
Und wurscht was da jetz du denkst , Baby
du hast ma nit gfehlt
Zrugg in mei Hotelbett ohne Platznot
I hab nit gjammert, hab nit great,
hab ma nit gwünscht i war tot

Mia gehts guat,
mir gehts guat
mir gehts guat, Baby
ja, mir gehts guat ohne di

I bin aufgwacht in der Fria
Trainingshosen, Jogginschuach
hab mi aufgmacht in Prater
Zrugg zum Lusthaus
wo die Pärchen sitzen
An di hab i nit dacht
nur ans Laufen und ans Schwitzen
zrugg ins Hotelzimmer, bissl Fernsehschaun
Des Bett war gmacht und aufgräumt war
Ja es war oanfach a Traum

Mia gehts guat,
mir gehts guat
mir gehts guat, Baby
ja, mir gehts guat ohne di

Bin aufgwacht heut am Nachmittag
hab mi aufgsetzt in meim Bett
Mei Magn hat knurrt, der Schädel brummt
I hab mi ins Bad gschleppt,
hab glaubt i will nimmer Leben
Rasierklingen und Schlaftabletten
da hätts Möglichkeiten gebn
Aber: Alles unter Kontrolle
I war so entspannt
Zehn Minuten kalte Duschn
und danach a frisches Gwand

Mia gehts guat,
mir gehts guat im neuen Gwand, Baby
mir gehts guat, Baby
ja, mir gehts guat ohne di 

Gedankenlesen______________Übersetzung: Ekkehard Tenschert

I woaß i übersieg vü, paß oft nit auf was i red
i bin so unaufmerksam grad wenns um di geht
I hab fast vergessen was i dir versprochen hab
danke daßd es sagst, Gedankenlesen is a Plag
Aber des wars am Anfang was mi zu dir hinzogn hat
I hab gwußt du hast an Klopfer sobald i di gsegn hab
Du hast gmoant i könnt da helfen, i hab a nit gwußt was toa
Des Ganze hast du mitbracht, es war größer wie mir zwoa
Es war vo dir

Aber i steh zur Verfügung, so habn mas ausgmacht
Versuach di nit z´verachten, i hab di no nie ausglacht
Und hast an Zusammenbruch, brennt wieder mal der Huat
Kimm zu mir, erzähl mirs und dann mach ma´s wieder guat
Politik spült a a Rolle und Ökonomie
tan ma mit bei der Konsumkultur und bei der Fitneßeuphorie
Es is wie Klettern, wie die Angst vorm obifalln
Es macht des Leben aufregend doch eppas muaß ma zahln
Manchmal muaß ma zahln

Früher habns gsagt: Liebe is des Lebens göttliche Zier
Aber wennst mi fragst reicht´s scho wenn i halbwegs auskimm mit dir
und des is oft gnuag a ewigs hin und her
weil wenn scho jeder andere gnuag hat wüllst du mehr 

Geschenke______________Übersetzung: Ekkehard Tenschert

Es kann allweil sein daß einmal
irgendwas sein kann
Daß einmal wirklich was
warad mit mir
Wenns einmal so sein sollt
Daß´s halt so sein soll
Wen solln´s verständigen
Wie wars mit dir?

I bin a lediger Waise
und hab koane Kinder
meine Gschwister wolln a nix mehr
z´toa haben mit mir
Von de wenign Freund de I hab
bist du mei bester
sag, war des okay wenn I´s
schickad zu dir?

Wenn des Telefon klingelt
wearst sicher koa Freud haben
wearst denken an früher
und alls was so war
Und dann wearst wohl langsam
die andern bescheid sagn
a traurige Pflicht aber
jemand muaß toa

Wenns mei Geldtaschn durchblattln
finden´s im Ausweis
ganz hintn dein Namen
auf am Blattl Papier:
Nur meine Spermien
de laß I verbrennen
alle andern Organe und Teile
ghörn dir 

HinigerIgel______________Übersetzung: Tassilo Tenschert

wie er letzte nacht hat üba d autobahn wolln
hätt er bessa zerst nach und nach rechts schaun solln
so hat er den lieferwagn übersegn
und der hat eahm dawischt und scho wars um eahm gschegn

jetzt liegt der hinige igl in der mittn vo da straßn
ganz zerpatzt liegt er mittn auf da straßn
da hast dein totn igl in da mittn von da straßn
und sei leich, de stinkt zum himmi

ja, des riacht nit grad als wia r a strauß mit rosn
drah des fenster auffi, hoit da zua dei nosn
ja, da brauchst gar nit schaun, es is a so ois klar
ois um was da geht, nimmst mim geruchssinn wahr
ja, de katz is hin und aa da hund is tot
und im fruahjoah gibts an haufn zpatzte krot
du hast dein plattn hasn und dei hinigs reh
vor lauter bluat und darm tuats da im beischl weh

ergänzung:
ja, nit amoi de stachln habn eahm da was gnutzt
da broade autoreifn hat eahm voi wegputzt
de igl tätns gern amoi umdrahd hobn
se warn dann riesig und scheibadn kloane autos zamm

dann gabads plotte autos in da mittn von da straßn
an riesen schrottsalat mittn auf da straßn
an haufn hinige autos in der mittn vo da straßn
und was drinnen war stinkad zum himmi 

Hotel Blues______________Übersetzung: Ekkehard Tenschert

In dem Hotel gibts Fernsehn nur bis zwoa
was kann a einsamer Rock´n´Roll Star toa
Des Bett is groß, frische Leintücher, klar
und dei Freundin hat gsagt du bist scho 19 Jahr
In der Minibar gibts Sektflascherl, Cola und Bier
Geh mit in mei Hotelzimmer, sei nett zu mir

I mag heut oanfach nit nur mehr hoamtelefoniern
I mag nit die ganze Nacht Blumentapeten anstieren
I woaß wenn ma rechnet daß´d zjung bist für mi
Aber mim Zungenkuß angfangt hab zerst nit i
I schreib a Lied für di, tuas auf mei neue CD
Schlaf mit mir, des war so schee

Es is a Bibel in der Schublade, wie sichs ghört
I häng a Schild an die Tür damit uns niemand stört
Es gibt extra Soaf, a extra Handtuch für di
und untn an der Rezeption red halt nur i
Morgen frühstück ma mitnander
Frische Semmerl tats gebn
Geh mit in mei Hotelzimmer, rett mei Lebn 

I War Grad Beim Doktor_____________Übersetzung: Ekkehard Tenschert

IwgbD und der Doktor sagt: Bua
Du schaust älter wie i aus, und i bi grad oanasiebzg wuan
du werst immer schwächer und werst di bald nimmer spürn
IwgbD und der sagt: Paß auf
wennst no lang durch die Lokale ziagst kimmst bald selber drauf
Des Lebn is a Wettkampf und du bist beim verliern

IwgbD, der sagt: Sei jetz nit feig
Der Körper is a Tempel und koa Spielzeug!
Da hast an Pappbecher, auffülln und der Krankenschwester gebn
IwgbD und der Doktor sagt: Mei,
Des sollat die Mitten, doch es könnt a s´Ende sei.
Schau besser daß sichs bessert sonst werts di nimmer lang gebn

Oh, i war grad beim Doktor...

IwgbD und der Doktor sagt: Gut,
Wir habn jetzt die Bilder, es is alles voller Blut.
Aber s gibt a was positives: (des Ergebnis von oam Test)
IwgbD und der Doktor sagt: Sohn,
Eppas falschs hast gessen oder trunken oder tan.
Es fangt oft ganz kloa an aber es broat sie aus wia die Pest

IwgbD und der Doktor sagt: Bitte,
Da hast a Rezept und dann ab durch die Mitte
In die Apothekn, dann nix wie hoam und ins Bett
IwgbD und der Doktor sagt: Na,
In nimm koane Schecks mehr, zahl mirs lieber in bar
Und meld di nächste Wochn, des hoaßt, wenn des dann no geht 

Nur A Hans______________Übersetzung: Ekkehard Tenschert

I bin wia mei Vater, mir gehts gleich wia eam
Wahrscheinlich kann ma des vererbn
Er hat mei Mutter gführt zum Altar
Immer no andere ghabt die ganzn Jahr
Und mit an Rausch, nach a paar Schnaps, a paar Bier
is er dann hoamkrochen kemman zu ihr
hat alls zugebn, hätt alls versprochn
Die Macht des Königs war gebrochen

Der Woody Guthrie hats scho erzählt
Es gibt halt mehr als oa hübschs Madl auf der Welt
Der Woody Allen, Bua, der kanns beschwören
Sein Samen ausstreun kann zerstören
I bin gefährlich, bin a wilder Hecht
mit einer Schwäche für des schwächere Geschlecht
bring in dein faden Karpfenteich an Sturm
Mei Blick a Haken, mei Lächeln a Wurm

Lange Beine unter am kurzen Rock
A Nachspeis ganz nach unserm Gschmack
Als Köder Nagellack und Lippengloss
Damit wir Männer wollen, ihr wißts scho was
Jeder Versuch zu widerstehn wär glacht
s´Meer hat no jede Sandburg niedergmacht
Und a im Dschungel fragt di koane Wann
Wenn sie bereit is bist du dran

Vü habns mit Saufen oder Drogen probiert
a Anderer verwett alls und verliert
Aber der Frauenliebling hat weit und breit
die leidigste und schlimmste Krankheit
Stets zu Diensten, hauptsach es gfallt
Vü von uns werden damit früh alt
Als großer Don Juan bittest zum Tanz
Aber im Endeffekt bist nur a Hans 

Papa Legt Si Hin______________Übersetzung: Ekkehard Tenschert

Halbe Elfe vormittag
eppas is mim Papa, i woaß nit was er hat
er steht auf, haut die Zeitung am Bodn
Falten auf der Stirn, es ganze Gsicht verzogn
Er geht auffi und werd nimmer gsegn
Der Papa is grantig, er geht sie niederlegn

Papa legt si hin, legt si hin, legt si hin
der Papa legt si nieder
Ja der Papa
geht scho wieder auffi, legt si hin

All mir Kinder druntn im Haus
miaßn ganz stad sei, leise wie a Maus
Is der Papa grantig, is er nit guat drauf
laß man lieber schlafen, weck man lieber nit auf
Er is a bissl gfährlich, wirklich wahr
Der Papa is grantig, jetz is er nit da

Mir kommt vor der Papa schlaft die meiste Zeit
Er is so grantig, es fehlt wirklich weit
Er schaut gern im Fernseher Zeit im Büd
Doch mitten drin werd er aufonmal ganz wüd
Die Mama sag des Geld is schuld und sei weher Fuaß
Der Papa is scho grantig a nur wenn er aufstehn muaß

Manchmal in der Nacht streiten d´Mama und er
Mir Kinder hörens schreien drunten im Parterre
Die Mama schimpft: Tua was, suach da endlich an Job
Und dann sagts: Du bist a alter Lapp
Aber in der Friah busslns umanand
Und legn si wieder nieder, hörst es lachen durch die Wand?

Papa legt si hin, legt si hin, legt si hin
die Mama legt sie nieder
Mama und Papa
gehn boade wieder auffi, legn si hin 

Sag Daßd Auf Mi Stehst______________Übersetzung: Tassilo Tenschert

i hab gsagt, i lieb di
(schau her:) i hab mi traut
du sagst (bloß), daßt mi gern hast
des hat mi niederghaut
geh sag, daßt auf mi stehst
i mag nit länger wartn
daßt mi gern hast, is nit gnuag
hearst, decks auf deine kartn

R: (bittschön) sag, daßt auf mi stehst
bittschön, gibs endlich zua
(geh) sag (endlich), daßt mi liebst
nachand gib i a ruah

du brauchst ma nix schenkn
koa krawattn, koan huat
du brauchst es nit zuagebn,
nur des tuat ma guat
geh sag, daßt auf mi stehst
bittschön sag ma's in echt
drei anfoche worte
warn fürn anfang nit schlecht

R: (bittschön) sag, daßt auf mi stehst...

(woaßt/stimmt) es is scho oft gsagt worn
trotzdem muaß i's hearn
i mag nit bloß dei bekannter sei
sag nit bloß du hast mi gern
du muaßt sagn, du liebst mi
wei sunstn geh i vor d'hund
mach auf dei herz
mach auf dein mund

R: sag, daßt auf mi stehst.... 

Scheen Daßd Da Bist______________Übersetzung: Ekkehard Tenschert

Mir fragn uns wann wearst außerschaun
Mir fragn was kimmt daher
Mir fragn uns obs´d a sie sei wearst
Oder vielleicht a er

Vielleicht brauchst no an ganzn Tag
Vielleicht nur a paar Stund
Mir hoffn daßd nit z´weh toa wearst
Und hoffn du bist gsund

Des Leben bringt a manchesmal
A Unannehmlichkeit
Du wearst nit immer sauber bleibn
Wearst rean von Zeit zu Zeit

Wennst oanmal da heraußn bist
Des miaß ma da no sagn
Kannst niemehr wieder eini zrugg
Da hilft koa schrein koa klagn

Es is nit allweil lustig da
Manchmal is´s ganz schön schwar
Mir glaubn es werd da trotzdem gfalln
und hoffn mir gfalln da a 

Schwimmlied______________Übersetzung: Tassilo Tenschert

im summa woa i schwimma
und dasoffn war i boid
hab mit d'händ und d'fiaß ummanondagschlogn
und gschaut, daß i d'luft anhoit,
gschaut, daß i d'luft anhoit

bin gschwumma im großn ozean
und in an hallenbod
hab mein wundn gsalzt und meine augn chloriert
a masochistischer idiot,
a masochistischer idiot

bin gschwumma ois wia r a haifisch
und ghupft wia r a delphin
und nachher ausm wassa gstiegn
elegant wia r a pinguin,
ois wia r a pinguin

bin gschwumma in an wassatank
und oans, des kannst ma glaubn
i woar a ganza nackapaz
bis auf mei badehaubn,
bis auf mei badehaubn

im summa hab i köpfler
und rückwärtssaltos gmocht
und oamoi, wia s nit gschaut habts
da hab i s zammdabrocht,
ganz ehrlich zammdabrocht! 

So Vü Lieder______________Übersetzung: Ekkehard Tenschert

I hab scho so vü Lieder gschriebn für di
des is des letzte, no oans wär zvü
Wenn i des vorsing beim nächsten Konzert
werds jeder wissen, die Welt hats ghört
I hab scho so vü Lieder für di gschpült
die meistn warn bitter, manche warn wüd
du hast mi heut s letzte Mal inspiriert
bald werst verschwunden sein, glei nach dem Lied

Nach all dem Streit, all der Müh und der Plag
Könnts nit sein, daß eh scho neamd mehr wirklich mag?
Des war unser Märchen, es werd nimmer mehr
unser Es War Amal is scho so lang her

I hab scho so vü Lieder für di gmacht
du sagst i hab di ausgnutzt, zumindest des hats bracht
bei allm was du tan hast war i dabei
I war dei Gfangener, bald bin i frei
I hab scho so vü Lieder gschriebn für di
des is des letzte, no oans wär zvü
lang hab i braucht bis i s endlich kapier
die Lieder über di handeln all nur von mir

Nach all dem Streit, all der Müh und der Plag
Könnts nit sein daß eh scho neamd mehr wirklich mag?
Des war unser Märchen, mitnander habn mas gschriebn
unser seeliges Ende war nit glücklich und zfriedn 

Therapie______________Übersetzung: Tassilo Tenschert

i frag mi, warum du mi gern hast
mi mag ja nid amoi no i
i glaub, mir 2, mir spinnan beide
mir brauchn halt a therapie!

nimm du a frau du brauchst a mutter
i suach an mann zum projiziern
wei schuid san sowieso die eltern
da brauch ma nit lang debattiern!

es muass wen gebn, der was si auskennt.
der herrgott woaß ois, oba helfen tut er nie...
und irgendwas miass ma unternehma
wie wärs mit ana therapiiiiiiie?

blos jede wochn zwoa termine
komm laß di gehn, laß oanfach los
danach gehts beide so vü besser
die depression wird nit so groß

in so a praxis samma sicher
wenn oide gfühle aufakemman
unbegrenzt gratis taschentücher
wenn di die tränen überschwemman

i bin voi angst und paranoia
du wirkst andauernd schuldbeladen
hysterisch sowieso - geh, tammas!
es kost so vü, da kanns nit schaden!

i frag mi, warum du mi gern hast
mi mag ja nid amoi no i
i glaub, mir 2, mir spinnan beide
komm reiß di zamm, komm gemma hi
a bißl Zeit für di und mi
180 Euro san nit zvü! 

WeißweinliebhaberInnen______________Übersetzung: Ekkehard Tenschert

Mei Mutter mag gern Weißwein
a Glasl oder zwoa
am Abend wenn sie Bsuach hat
im Notfall a alloa
Veltliner, Müller-Thurgau
Pinot oder Chablis
nimmt dem Tag die Schärfen
macht a warmes Gfühl
nimm dem Tag die Schärfen
und du hast a wärmers Gfühl

Wir machn oft mitnander
a Flascherl Weißwein auf
bei ihr auf der Veranda
des is a schöner Brauch
Mir redn über mei Kindheit
und wie des war bei ihr
dann kemm ma zu meim Vater
da wechsel i zu Bier
Immer wenn ma zum Vater kemman
wechsel i zu ( mei Mutter mag gern