Dictes moy: ou, ne en quel pays
Est Flora, la belle Romaine,
Archipiade, ne Thais,
Qui fut sa cousine germaine?
Echo, parlant quand bruyt on maine
Dessus riviere ou sus estan,
Qui beaulté eut trop plus que humaine?
Mais ou sont les neiges d'antan?

Ou est la tressage Helois,
Pour qui fut chastré (& puys moyne)
Pierre Esbaillard a sainct Denys?
Pour son amour eut cest' essoyne.
Semblablement ou est la Royne
Qui commanda que Buridan
Fust jetté en ung sac en Seine?
Mais ou sont les neiges d'antan?

La Royne Blanche comme lys
Qui chantoit a voix de sereine,
Berthe au grand pied, Bietris, Allys,
Haremburgis qui tint le Mayne,
Et Jehanne la bonne Lorraine
Que Angloys bruslerent a Rouen?
Ou sont ilz, Vierge souveraine?
Mais ou sont les neiges d'antan?

Prince, n'enquerez de sepmaine
Ou elles sont, ne de cest an,
Que ce refrain ne vous remaine:
Mais ou sont les neiges d'antan?