UMFUNKTIONIERUNG oder
wie nützlich es ist soldat gewesen zu sein

woa a hoid do
fia wos guad
dea scheisdregg
dea vafluachde
wäu
wia i so siach
de medäun
so sche
midda schoafn kandn
wia i so les
den schenan
badriodischn schbruch
ALLZEIT BEREIT
und so weida
dois ma glei
de mial eigfoin
mei oide
kensdas e
de geule kods
do is ma a eigfoin
wo i mas aufehäng
de blangedn
wäu
des eisane greids
des wos mei grosvoda
in sibzenajoa
fia sein hoidshagsn griagd hod
is scho gauns ogwedsd
na
kensdas e
de mial
de hase oide
de geule

wia ma gesdan
drausd im glanda
de jungbugln
des vahoidn ois bosdn gleand haum
im griag
wasde
zeaschd schiasn
daun frogn
hod unsa leidnaund
kensdeame
in gfüdn glodsadn
a grod gfaunga
a recht a fedde oide
und hods
ina dosn eineghaud
wusch
de hods zrissn
und de grod
is gfogn
finf meda wia nigs
und gauns schwoads is gwesn
und badsig
gö glass
und gfäud hods oiswia aubrends fleischlawal
owa glebd hods noima
des gribbövich
des ölendiche
do hodas daun
min schdifö zahadschd
da waumbade leidnaund
dos nuaso gschbridsd hod
rundumadum
glass gö
nua ana vonde gschdudiadn
de damischn hund
hodse augschbim
dea hiniche keal
san hoid nigs wead
de wachn bodsn
san hoid noned launggnua
beim müledea
drim
auf ana wiesn
in los änscheles
wauns duad
aufaranaundagnozn
a boa hundaddausnd
und eanan hasch hadsn
oda wiara sundsd no hasd
dea dregg
daun soid ma
drieba fliang
mid de flugzeig
wasde
wia mas zum ruamschbridsn hod
und blauseire owelaan
dos eana nua so einerind
in eanare goschn
in de vafluachdn
doss varaggn
ollemidaranaund
und wauns
daun olle hi san
soid ma kumma
mid de pfliag
mid de via schoarign
unds olle eieggan
diaf owe
unda de ead
daun wa endlichamoi
a rua auf dera wöd
und a dea bresidend
da nigsn häd sein friadn
wö kana
ded mea de babn aufreissn

 

Berufsphilosophischer Ratschlag

wuansdas
zuwos bringa wüsd
so wia i
muasd anjedn ofisia
anjedn sog i
in oasch einegräun
waunsddaun
middein schedl
bei sein mäu auseschausd
muaseam
ins gfris lechln
oba dinsdeifrig
oba jo dinsdeifrig
so wia i