Mundl bekommt Internet
 

Neilich wor ma beim Karli, wast ä, mein deppadn Buam, auf Besuch in seina Gemeindewohnung. Muass sogn, schäh hodas scho do. Ollas is modern, de Kuchl schaut aus, ois kenntats allanich kochn und im Wohnzimmer steht a drum Fernsea, so groß wia a Kinoleinwaund. Sogoa a eiganes Bürozimma hoda in dära Burg. Und weu da Karli iwahaupt ka Einädrara is, hot a ma glei sei neichste Erunganschoft zagt, nämlich sein Blechtrottl, genaunt Kompjuta oda so. Mit dem kauna si sogoa ins Intanet eiwöhn, dea obagscheite Herr dea. Und weu da Karli eben da Karli is, hot a mi glei gfrogt, waun i ma a sowos do zualeg. I sog zu eam, heast, du glaubst a, i bin so deppad wia du ausschaust gö?

Daun, wia i und de Toni wieda daham woan, is ma des gaunze nimma ausn Kopf gaunga und aum Montog bin i in des Telekaböbüro glei bei uns ums Eck gaungan und hob mi erkundigt, wia sowos funktioniern tätat. Duat is a so a Mochatschek gsessn, dea hot a glaubt, das a de Wöd erfundn hod. Er hod mi duat niedagschwafföd, bis ma de Bian graucht hod, is anzige, wos i vastaundn hob woa, das i fia a Intanet mindestens an Kompjuta brauch, sunst is nix mit Sörfn. Na guat, bin i umä zum Cosmos und hob mia ums Ualaubsgöd a so a Maschin kauft, mit dära kaunst sogoa Musik mochn. Daun hob i ma glei vum Telekabö sein Iwagscheitn an Termin gebn lossn und jetzt sitz i scho seit sechse in da Frua do und woat, bis drausn aun da Tia leit.

Na endli woas soweit und dea Koffa is bei uns in da Wohnung gstaundn und de Frogarei is scho losgaungan. " Wo is dä Telekabödosn, wöchan Kompjuta hom sä, homs a Netzweakkoatn, wöches Windos hom sä?" und so fuat. I bin ma fuakumman wia da grässte Trottl auf da Wöd. Wira gsegn hod, wöch oames Hascherl i punkto soichane Sochn bin, hod a si söwa ollas augschaut, hod gsegn, das i a Netzweakkoatn eibaut hob und hod dä glei beim Telekabö freischoitn lossn, was da Teifö, wos a do genau damit gmant hod. Daun hot a si no mei Telekabödosn augschaut und hod gmant, dä gheat tauscht, weus ned rückkanalfähig is, wast ä gö?

Endli sama zum wesentlichen kumman, nämli zum Intanet, auwa däs hod a wieda dauat, weu de deppade Netzweakoatn no ned freigschoin woa. I was ned, waun i is Liacht eischoit, daun ged des imma Ruck zuck, bei denan dauat sowos glei a viatl Stund, des eischoitn. Des zum Thema schnölles Intanet. Ea hot ma daun no so a klanes Kastl aun mein Kompjuta augsteckt, woascheinli a Werbegeschenk, weu Er gsegn hod, das i scho a bissl sott woa. Do woan vülle Lichta drau und de hom blinkt. Mir hots so ä gaunz gut gfoin, auwa ea hod gmant, do passt da Pägel ned, weu de Lichta soitn leichtn und net blinckn. Er is aufn Gaung ause und hätt fost in Kurti niedagrennt, dea hot nämli grod draust Gaunggwoschn. Duat hot a aun de Kabön umaduamgschoitn bis drin auf den klanan Kastl olle Laumpn gleicht hom.

Fortsetzung folgt

Eicha Mundl